bayat atı birle sözüg başladım
törütgen égidgen keçürgen idim

üküş ögdi birle tümen miñ senâ
uğan bir bayatka añar yok fenâ

yağız yér yaşıl kök kün ay birle tün
törütti halâyık öd üdlek bu kün

tiledi törütti bu bolmış kamuğ
bir ök bol tédi boldı kolmış kamuğ

kamuğ barça muñluğ törütülmişi
muñı yok idi bir añar yok éşi

ay erklig uğan mengü muñsuz bayat
yaramaz seniñdin adınka bu at

uluğluk saña ol bedüklük saña
seniñdin adın yok saña tuş tenge

aya bér birikmez saña bir adın
kamuğ aşnuda sen sen öñdün kédin

sakışka katılmaz seniñ birlikiñ
tüzü neñke yetti bu erkliglikiñ

séziksiz bir ök sen ay mengü eçü
katılmaz karılmaz sakışka seçü

ne ersedin ermez seniñ birlikiñ
ne erselerig sen törüttiñ seniñ

kamuğ sen törüttüñ ne erselerig
yokadur ne erse sen ök sen tirig

törütgen barıña törütmiş tanuk
törümiş iki bir tanukı anuk

anıñ okşağı yok azu meñzegi
neteglikke yetmez halâyık ögi

yorımaz ne yatmaz udımaz oduğ
ne meñzeg ne yañzağ kötürmez boduğ

orun ol törütti orun yok añar
anıñsız orun yok bütün bol muñar

K*rt lütfen

t*rk lutfen