0
Buxoro shahrida 30 aprel – 1 may kunlari “Asrlar sadosi” an’anaviy madaniyat festivali bo‘lib o‘tdi.
Prezidentimiz Islom Karimov rahnamoligida istiqlol yillarida ozod, erkin va farovon hayot barpo etishdek ezgu maqsad yo‘lida amalga oshirilayotgan ulkan ishlar milliy ma’naviyatimizni tiklash va yuksaltirish, azaliy qadriyatlarimizni asrab-avaylash, izchil rivojlantirish bilan uyg‘un tarzda olib borilmoqda.
“O‘zbekiston madaniyati va san’ati forumi” jamg‘armasi va YUNESKOning yurtimizdagi vakolatxonasi hamkorligida ko‘hna va boqiy Buxoro shahrida o‘tkazilgan “Asrlar sadosi” an’anaviy madaniyat festivalida bu jihatlar yana bir karra o‘zining yorqin ifodasini topdi.
Davlatimiz rahbarining 2011 yil 6 aprelda qabul qilingan “O‘zbekiston Respublikasi davlat mustaqilligining yigirma yilligini nishonlashga tayyorgarlik ko‘rish va uni o‘tkazish to‘g‘risida”gi qarorida xalqimizning ijtimoiy-siyosiy, ma’naviy hayotida beqiyos o‘rin tutadigan, har yili eng ulug‘, eng aziz bayram sifatida katta shodu xurramlik bilan nishonlanadigan qutlug‘ ayyom – istiqlolimizning 20 yillik sanasini baland ruh, ko‘tarinki kayfiyatda kutib olishga alohida e’tibor qaratilgan.
Mazkur an’anaviy festival ham har gal yorqin, betakror, unutilmas voqealarga boy bo‘ladi. Vatandoshlarimiz, ayniqsa, yosh avlod qalbida chuqur taassurot qoldiradigan ko‘plab tadbirlar istiqlol yillarida barkamol avlodni tarbiyalashga qaratilayotgan ulkan e’tibor va g‘amxo‘rlik samaralarini yaqqol namoyon etadi.
2006 yildan buyon o‘tkazib kelinayotgan “Asrlar sadosi” an’anaviy madaniyat festivali milliy an’ana va qadriyatlarimizni asrab-avaylash, yanada rivojlantirish, bu yo‘nalishda unutilayozgan uslub va maktablarni qayta tiklashda alohida ahamiyat kasb etmoqda. Ayni paytda mazkur festival boy ma’naviy merosimizni keng namoyish etish, san’atning turli yo‘nalishlarida faoliyat ko‘rsatayotgan ijodkorlarni qo‘llab-quvvatlash, ularning ezgu intilishlarini xalqimiz va xalqaro jamoatchilikka yaqindan tanishtirish imkonini bermoqda. Festivalning har yilgi tadbirlari so‘lim tabiat go‘shalari, qadimiy shaharlar, yodgorlik majmualarida bo‘lib o‘tayotgani uning yil sayin miqyosi va ko‘lamining tobora kengayib, mazmunan boyib, rang-baranglashib borayotganidan dalolatdir.
